ابن موت

موضوع: ابن موت الإثنين يوليو 12, 2010 3:06 pm

إبن موت ...
لمــّا خَدِتنى ف حِجرها جدّتى ..
سمــِّت وقالت: دا ابن موت !!
أمّـنِت على قولها خالتى وعمّتى ..
حتّى أمى يوميها قالت: أيوه يا امّـه.. إبن موت .
وفِضلت اشِبّ واشبّ واكْـبَر ..
والعيون كات بتتابعنى..
كل الصبايا والولايا يمصمصوا ويتصعّبوا ..
مِسكين يا عينى ماهو ابن موت ..
حتّى المُنجّم برضه قال: الواد دّا مش هيموت فى برّ..
مِن خوفى تتحقق نبوءته ..
خاصمت حتى البحر والنيل والترع .
وفضلت برضه أشب واكبر وآدينى خيّبت الظنون..
وعشت فوق 30 سنه ..
30 سنه كانوا مليانين بالعربده ..
سارقانى سكّينة الحياه ..
لاف يوم هِدِيت ولا هَدّنى أعتى الطُّغاة..
ولمـّا ساعة الصفر حلّت ..
قريتها ف عيونك يا أمّى ..
لمـّا اشتكيت م اللى اشتكى منه ابويا قبل موته بأسبوعين..
رغم أىّ محاوله للتخفيف عليّـا كات واضحه ف عيونِك قوى..
لمّـا قُلتى بابتسامه محمّله بقهر السنين: هتعيش يا واد..
ييجى 100سنه فاكرانى طفل هاصدّقِك..
ما خلاص كِبِرت وعارف انّ نهايتى جت..
ما خلاص كِبِرت .وعارف انّ نهايتى جت .